大俠揮刀論民俗:黃文博推薦新書《大廟埕・戲棚腳》

文/黃文博 (臺南知名民俗研究者)

圖為知名民俗研究者黃文博校長(胡祐禎拍攝)

「江湖走跳看民俗,大俠揮刀論古今」,這是我對「知名教授」茂賢兄關心臺灣民俗的一个形容。足少研究臺灣民俗的學者,願意家己長期行入民俗的田野現場,參與祭典、綴(tuè;跟隨)行綴走綴踅庄,風吹日曝雨淋,半暝來透早走,甚至帶領學生親近土地,向民間學習,這是愛有一寡仔使命感佮對性命的堅持,才有法度做會到。

嘛因為伊是一个「知名教授」,閣人人好,無派頭、袂激氣,所以行到佗位都有人捌伊,逐時予人招欲翕相(hip-siòng;照相),連高鐵咧賣物件的小姐,都攏講是伊的學生,因此,佇江湖走跳,伊就毋敢做歹代誌,閣較按怎假仙,都愛有淡薄仔「大俠」的形象出現。

其實,林教授是一个行入臺灣民俗上深層的學者,興趣多元,活力十足,佇開課傳徒以外,嘛參與公部門文資法令的擬訂修改、民俗審議,猶閣被聘評審各種民俗比賽,印證學術實務、計畫操作的落差,這對伊蓋世武功的練成,有誠深的影響。毋但按呢,伊猶閣有氣力去電臺做節目,閣做甲著金鐘獎,學識、口才、內涵兼具,腹肚內有遮爾濟墨水,這攏是長期關心民俗、參與民俗、思考民俗、批判民俗而自我建立的一套智識論述系統。

放眼當今民俗武林,無幾个有林茂賢勤快骨力的跤跡,嘛無幾个有伊的多元學識,閣較無幾个有伊參與各級政府審議民俗的機會…;遮爾濟「無幾个」,就是伊有才調「著書立說」的基礎佮方法之論。

這擺,茂賢兄就將伊遮幾冬來參與學術發表會所發表的論文,佮佇報章雜誌所寫的大細篇文章,結集成冊,分做「研究論文」佮「評論隨筆」兩大部分,將伊所看、所知、所感觸,有系統性、有研究性來行諸文字,予逐家鼻芳,毋但會當做紀錄、做研究,嘛會當予咱一寡啟示。

這本冊無所無談,無啥禁忌,男女老幼、大人囡仔攏會佮意讀,干焦看遐爾濟趣味的題目,就會予你流喙瀾矣。

編按:本套書為林茂賢教授數十年來於臺灣民俗文化與傳統表演藝術領域研究耕耘之文章集結,上冊為民俗、下冊為傳統戲曲,採單獨發行並有合冊販售。各冊都蒐錄有研究論文、專文隨筆與文化評論等類型,兼具學術論述與通俗文章,是認識臺灣民俗與文化必讀之基礎教材,也適合作為一般大眾認識民俗文化與傳統表演藝術之書籍。

大廟埕:林茂賢臺灣民俗選集戲棚腳:林茂賢臺灣傳統戲曲選集

2018年7月11日正式上市;預購請點洽:博客來讀冊生活

【推薦閱讀】心繫鄉土護戲曲:廖瓊枝推薦新書《戲棚腳》

民俗亂彈-01歡迎訂閱民俗亂彈粉絲專頁

豐饒文化社

關於作者 豐饒文化社

用專業與熱情出版民俗文化書籍,典藏民俗生活、珍惜豐饒臺灣。

3 comments

回饋與討論

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料